Komediyalar Aləminə Səyahət

"AzQosKomediya" İstehsalat Birliyi

ŞOK XƏBƏR: Danimarka hökuməti istefa verdi

leave a comment »

Baş Nazir Torning-Şmidt istefadan sonra

Baş Nazir Torning-Şmidt istefadan sonra

Keçmiş Baş nazir Torninq-Şmidt: “Millətimizi və dövlətimizi çətin sınaq gözləyir”

Kraliça II Marqrete: “Mən taxtdan imtina edib monastra gedirəm”

AzTV müxbirinin Kopenhagen aeroportunda çek-in etməsindən 10 dəqiqə sonra Danimarka hökuməti tam tərkibdə istefaya çıxıb. Ölkədə konstitusiya böhranı yaranıb.

Avroviziya 2013 yarışmasında Danimarka təmsilçisi qalib gəldikdən sonra rəsmi Kopenhagen AzTV-nin hədəfinə tuş gələcəyini ehtimal etdiyindən ölkədə fövqəladə vəziyyət elan edib. İsveçdə ezamiyyətdə olan AzTV müxbirlərinin Danimarka ərazisinə keçməsini əngəlləmək üçün Baltik üzərindəki bütün körpülər bağlanıb, bütün gəmi və bərə nəqliyyatı dayandırılıb.

Hökumətin təcili göstərişi ilə, Brüsselə xəbər vermədən Danimarka birtərəfli qaydada Şengen zonasından çıxaraq milli viza sistemini bərpa edib.

Amma bu da rəsmi Kopenhageni iflasdan qurtara bilməyib. Yarışmanın bitməsindən az keçmiş adı çəkilməyən AzTV müxbiri Kopenhagenin Kastrup aeroportunda olduğu barədə Facebook’da check-in edib.

AzQosKomediyanın Danimarka mətbuatına istinadən verdiyi xəbərə görə AzTV müxbirinin Kopenhagen aeroportunda görünməsi ölkədə panika yaradıb. Hal-hazırda paytaxt və ətrafı sürətlə boşalmaqdadır. Kopenhagen meriyasının şəhərdə zibillikləri təcili sürətdə təmizləmək cəhdləri fayda vermir. Kommunal təsərrüfat işçiləri AzTV kameralarına düşməkdən qorxduqları üçün işə çıxmırlar.

Danimarkanın solçulardan ibarət koalisiya hökuməti dərhal istefaya gedib.  Ölkədə fəvqəladə vəziyyət elan olunub. Televiziya vasitəsilə xalqa müraciət edən keşmiş Baş nazir Helle Torninq-Şmidt ölkəsini və xalqını qarşıda çətin sınaq gözlədiyini deyib.

“Mən qarşıda ancaq iztirab, sonsuz məşəqqətlər və qan görürəm. Mən bu yükün altına girə bilmərəm,” deyə Torninq-Şmidt vurğulayıb.

Kraliça II Marqrete isə Parlamentə müraciətində taxtdan imtian etdiyini və monastra çəkiləcəyini bildirib.

Hazırda Danimarkada konstitusiya böhranı yaranıb. Müxalifət qüvvələri gələn bazar günü Kopenhagenin mərkəzi meydanında böyük mitinq planlaşdırır.

İqtisadiyyat da siyasi böhrana cavab olaraq çöküb. Banklar işləmir, ictimai nəqliyyat dayanıb, pensiyaların verilməsində fasilə yaranıb.

Hadisəyə öz Facebook səhifəsində münasibət bildirən AzTV-nin sədr müavini İbrahim Məmmədov Danimarkada baş verənləri qorxaqlıq və “söz azadlığına hücum” adlandırıb:

“Kopenhagen həqiqətdən niyə qorxur axı? Nə qədər sabun köpüyündə yaşamaq olar? AzTV-nin kameralarından qorxub gizlənən bir hökumət bilmirdi ki, öz xalqını aldatmağın sonu bir gün çatacaq? Hələ atalarımız deyib ki, yalanın ömrü qırx gündür!”

Written by Ali S. Novruzov

May 19, 2013 at 3:51 axşam

Müxalifət Nura Surinin Prezidentə müraciətinə qoşuldu

leave a comment »

Nura Suri / Last.fm

İctimai Palatada təmsil olunan siyasi qüvvələr Azərbaycan estradasının ulduzu Nura Surinin Prezident İlham Əliyevə minnətdarlıq müraciətinə qoşulub.

Xatırladak ki, Nura Suri Prezidentə müraciətində Milli Ordumuzun zabiti, Macarıstanda həbsdə olan Ramil Səfərovun vətənimizə dönüb, azad edilməsinə təşəkkürünü bildirmiş və sevincini bölüşmüşdü.

Müxalifətin müraciətə qoşulması barədə Müsavat başqanı İsa Qəmbər AzQosKomediyaya eksklüziv açıqlamasında bildirib. İsa Qəmbərin sözlərinə görə bu haqda təklif Nuranın prodüsserindən gəlib. Onlar da müraciətin mətnini İctimai Palata daxilində müzakirə edib bir neçə düzəlişlə qəbul ediblər.

Müraciətdə qeyd edilir ki, Ramil Səfərovun səkkiz ildən sonra Azərbaycana ekstradisiya edilməsi və əfv olunması Azərbaycan dövlətinin xalqına olan qayğısının göstəricisidir. Eləcə də Azərbaycan dövlətinin öz vətəndaşına sahib çıxmağı bacarması vurğulanır.

Müraciət müxalifət cəbhəsində və ictimai sektorda heç də birmənalı qarşılanmayıb. Bəzi sıravi partiya üzvləri və müstəqil fəallar müraciətə kəskin etiraz ediblər.

Bəstəkar Firudin Allahverdi isə etiraz əlaməti olaraq Müsavat partiyasını və İctimai Palatanı tərk etdiyini bildirib. Öz Facebook profilində yazdığına görə bu addımına səbəb müxalifətin həvəskar və naşı bir müğənniyə göstərdiyi hədsiz diqqət olub:

Mən özüm dörd il konservatoriya oxumuşam, professional musiqiçiyəm, mən deyəndə ki, gəlin Prezidentə təşəkkür edək, mənə qulaq asmırlar, amma hansısa ibtidai musiqi təhsili olmayan adamın müraciətinə dərhal qoşulurlar.

İsa Qəmbər də öz növbəsində Facebook’da tənqidləri cavablandırıb. O, tənqid edənlərə, hətta partiyadan gedənlərə dözümlü yanaşmağın vacibliyini vurğulayıb.

“Məsələnin mahiyyətinə gəldikdə isə, mən əminəm ki, bu qərarımız istər taktiki, istərsə də strateji baxımdan düzgün qərardır,” deyə əlavə edib.

Məsələ ilə bağlı AsQosKomediya həm Nura Suri, həm də onun prodüsserinin mövqeyini öyrənməyə cəhd etsə də, onlarla əlaqə saxlamaq mümkün olmadı.

Written by Ali S. Novruzov

Sentyabr 16, 2012 at 2:05 səhər

Loreen İctimai Palataya üzv oldu – ŞOK XƏBƏR

with 2 comments

Loreen / Wikimedia

Avroviziya 2012 mahnı müsabiqəsinin isveçli qalibi Lorin Təlhavi (Loreen Talhaoui) İctimai Palataya üzv olub. Bu barədə Lorin 15 iyun tarixində öz Facebook profilində xəbər yayıb.

Lorinin status yenilənməsində deyilir:

Mən Bakıda olanda çıxışıma hazırlaşmaqdan əlavə, həm də insan haqları təşkilatlarına getdim, azərbaycanlı hüquq müdafiəçiləri ilə görüşdüm. Orada dəhşətli faktlarla tanış oldum, hekayələr eşitdim. Bu rejim Avroviziyanı keçirmək üçün konsert zalı tikərkən insanları heç nə vermədən evlərindən çölə atıb. Bu, doğrudan da hörmətsizlikdir. Mən ümid edirdim ki, Avroviziyadan sonra onların vəziyyəti yaxşılaşacaq. Amma indi biz bunun əksini görürük. Görüşdüyümüz cəsur insan hüquq müdafiəçilərindən biri Mehman Hüseynov xuliqanlıqda günahlandırılır, 5 illik həbs oluna bilər.

Ona görə də qərara almışam ki, Azərbaycandakı rejim ilə mübarizəmi bundan sonra İctimai Palatanın sıralarında davam etdirim.

Loreen həm də İctimai Palatanın İsveç şöbəsini yaradacağını bildirib və qeyd edib ki, İsveçin nüfuslu dövlət xadimlərindən bəziləri artıq bu şöbəyə üzv olmaq istəklərini dilə gətiriblər.

İctimai Palata və ümumilikdə ictimai sektor by xəbəri böyük çoşqu ilə qarşılayıb. Facebook və Twitter sosial şəbəkələrində azərbaycanlı istifadəçilər Lorini bu cəsarətli addımına görə alqışlayırlar.

İctimai Palatanın koordinasiya şurasının adının çəkilməsini istəməyən üzvü isə AzQosKomediyaya eksklüziv açıqlamasında deyib ki, İsa Qəmbər və Əli Kərimli müxalifətin hakimiyyətə gələcəyi təqdirdə Lorinə xalq artisti adının verilməsi barədə artıq razılığa da gəliblər. Sadəcə bəzi obyektiv və subyektiv səbəblərdən qərar gizli saxlanılır.

Xatıladaq ki, əslən cənubi Mərakeşdən olan Lorin Təlhavi 1983-cü ildə Stokholmda dünyaya göz açıb. O, 2012-ci ilin mayında Avroviziya mahnı müsabiqəsində İsveçi təmsil edib və “Eyforiya” adlı mahnı ilə qalib olub.

Bakıda olarkən Lorin bir sıra hüquq müdafiəçiləri ilə görüşmüş, “Demokratiya naminə oxu!” kampaniyası ilə maraqlanmışdı. Bu səbəbdən Azərbaycan hökuməti müsabiqənin təşkilatçısı olan Avropa Teleyayım İttifaqına Lorin barədə şikayət etmişdi.

İqtidar müxalifət və xalqın dilini-ağzını bağladı

leave a comment »

Şəkil şərtidir

“Yeni Xüravat”dan şok iddia – hökumət ölkəyə cadugərlər ordusu gətirib, yerli və xarici cadugərlərə müxalifət və xalqı tilsimə salmaq tapşırığı verilib.

Azərbaycan hökuməti dünya miqyasında tanınan cadugərlərin xidmətində istifadə etməyə başlayıb, hətta bir çoxunu ölkəyə işləməyə dəvət edib. Bu barədə ölkənin ən mötəbər və nüfuzlu qəzetlərindən biri “Yeni Xürafat” məlumat verib.

Qəzetin yazdığına görə böyük xərclər hesabına həyata keçirilən bu layihənin konkret və ciddi bir məqsədi var: ölkədə kütləvi proseslərin, qarışıqlıqların, inqilabların qarşısını almaq, kütləvi psixoz prosedurları ilə toplumda fəaliyyətsizliyi təmin etmək.

Şərti olaraq “cadugərlər” adlandırılan bu mütəxəssislərin – Afrikanın cənubundan “kuaren deyro”, qərbindən – “nqombo”, mərkəzindən – “menduk”, Yava adalarından – “dikun”, Qrenlandiyadan – “anqanok”, Perudan – “bruco”, Rusiyadan – “çarodey”, “koldun”, Uzaq Şərqdən – “yoq”, “fakir”, Avropadan parapsixoloq və okkult ekspertlərinin Bakıya daşınıb gətirilməsi ötən ilin aprelindən başlayıb.

Qəzet iddia edir ki, ötən il “ərəb bahar”ının Azərbaycandan yan keçməsinin, xalqın ayağa qalxmamasının bir səbəbi də məhz bu “cadugərlər layihəsinin” işə salınmasıdır. Burada əsas hədəf toplum olsa da, əslində müxalifətin önəmli fiqurları da dəvət edilmiş cadugərlər briqadasının cadu və başqa növ enerji yükləmələrinin hədəfindədir. Klassik dillə deyilsə, hazırda dünyanın ən yaxşı və bahalı cadugərləri Azərbaycan müxalifətinin dilini-ağzını bağlamaqla məşğuldur.

Bakıda və ümumiyyətlə əhalinin gur toplaşdığı yerlər, bazarların, universitetlərin və metrostansiyaların giriş-çıxışları xüsusi cadu elementləri ilə tilsimlənib. Metrostansiyaların girişlərində yerə xüsusi mıxlar vurulub, eskalatorlara da bir sıra elementlər bərkidilib – bunlar toplumun dağıdıcı, yıxıcı və ümumiyyətlə, hər cür enerjisini yavaşmalıdır. Belə yerlərdə xüsusi və hiss edilməyən ətirlər yayılır, cadulanmış sular səpilir, hamının əl, yaxud ayaq basa biləcəyi hansısa predmetlər qoyulur.

Mənbəmiz deyir ki, rejimə sadiq olan zəngin məmurlar hakimiyyəti xalqdan qorumaq üçün dünyadakı bir sıra hipnoz, telekinez, zombiləşdirmə və ümumiyyətlə, bugünkü ekstrasensorikanın ən güclü mütəxəssislərini bir komandada toplaya bilib. Bu, hakimiyyətin “əks-inqilab komitəsi” də sayıla bilər.

AzQosKomediya məsələ ilə bağlı hakimiyyət nümayəndələrinə müraciət etsə də onların mövqeyini öyrənə bilməyib. Müxalifət nümayəndələrindən müraciət etdiyimiz Pənah Hüseyn isə bu cəhdlərin əbəs olduğunu bildirib.

“Mən özüm bircə dua yazaram ki, bütün bu tilsimləri sındırar, hələ bir hakimiyyətin özünü tilsimə salar. Nahaq yerə mənə el arasında “Molla Pənah” demirlər. Ondansa getsinlər real siyasi və iqtisadi islahatlara başlasınlar,” deyə Pənah Hüseyn müxbirimizə bildirib.

Written by Ali S. Novruzov

Yanvar 11, 2012 at 7:21 axşam

Eldar Əzizov ad günü tortundan zəhərləndi!

with one comment

Eldar Əzizov tortun dadına baxandan sonra

Keyfiyyətsiz ərzaqdan hazırlanmış 50 metrlik tortun ilk qurbanı Sumqayıtın İcra Başçısı Eldar Əzizov olub. O, zəhərlənmə diaqnozu ilə artıq şəhərdəki özəl klinikaların birinə yerləşdirilib.

Prezident İlham Əliyevin 50 yaşının tamam olması münasibətilə Sumqayıt şəhərində Kimyaçılar Mədəniyyət Sarayının qarşısındakı meydanda təqdim edilən 50 metrlik tort keyfiyyətsiz ərzaqdan hazırlanıbmış.

Məsələ ilə Sumqayıt polisi və prokurorluğunun yaratdığı birgə istintaq-əməliyyat qrupu bu xəbəri təsdiqləyib.

Hüquq mühafizə orqanlarının verdiyi ilk açıqlamada deyilir ki, ad günü tortunun hazırlanması zamanı bəzi iş adamları və qənnadıçılar keyfiyyətsiz və vaxtı keçmiş ərzaqlardan istifadə ediblər. Sözügedən tort istehlaka tam yarasız halda olub və Eldar Əzizov da bu səbəbdən zəhərlənib.

Hadisə yerinə Fövqəladə Hallar Nazirliyinin xilasedici qüvvələri də ezam olunub. Hal-hazırda şəhərdə tortdan zəhərlənən digər vətəndaşların axtarışı gedir.

Hadisələri daha yaxından izləmək və vəziyyəti öyrənmək üçün Sumqayıta gələn Azad İstehlakçılar Birliyinin Sədri Eyyub Huseynov Bakının 30 kilometrliyində böyük bir epidemiya ocağının yaranması ehtimalı barədə xəbərdarlıq edib.

Bununla belə sıravi Sumqayıtlılar özlərini gümrah hiss edir və optimistdirlər. Adının çəkilməsini istəməyən bir şəhər sakini AzQosKomediyaya müsahibəsində deyib ki, Eldar Əzizov şəhərə təzə köçdüyündən Sumqayıt havasına öyrəncəli deyil , ona görə də belə xırda problemdən ürəkbulanma keçirib.

Xatırladaq ki, Eldar Əzizovun hələ Gəncədə İcra Başçısı olarkən əsasını qoyduğu bu ənənə – Prezidentin ad gününə nəhəng tortun bişirilməsi bu il ilk dəfədir ki, Sumqayıtda baş tutub. Tortun uzunluğu 50 metr, çəkisi isə 12 ton olub.

Written by Ali S. Novruzov

Dekabr 25, 2011 at 12:32 səhər

Azərbaycandan Fransaya sarsıdıcı zərbə!

leave a comment »

Hakimiyyətin bölünməsi prinsipi reallıqda

Fransa Milli Assambleyasının “erməni soyqırımını” inkar edənlərin cəzalandırılması haqqında son qanun layihəsinə Azərbaycan dövlətindən sərt cavab gəldi.

Dekabrın 23-də Milli Məclisin sessiyasında iştirak edən millət vəkilləri fransız mütəfəkkiri Monteskyönün “hakimiyyətlərin bölünməsi“ prinsipindən imtina barədə yekdil qərar qəbul etdilər.

Təşəbbüsün ideya müəllifi YAP-çı deputat Mübariz Qurbanlının çıxışı millət vəkilləri tərəfindən ayaq üstündə, davamlı və sürəkli alqışlarla qarşılandı.

Mübariz Qurbanlı qeyd etdi ki, Azərbaycanın özünün yaratdığı və dünyaya nümayiş etdirdiyi uğurlu dövlətçilik modeli var və 21-ci əsrdə dünyanın bütün mədəni ölkələri Azərbaycan modeli ilə silahlanmalı, prinsipsiz fransızların “prinsipi”ndən çoxdan əl çəkməlidirlər:

“Belə həyati məsələ barəsində gözləmə mövqeyi tutmaq və qardaş türk xalqını tək buraxmaq olmaz. Necə ki, Azərbaycanda hakimiyyətin bütün qolları əl-ələ verib bir ürək, bir mərkəz kimi işləyir, eləcə də Türkiyə və Azərbaycan çiyin-çiyinə verib dağ kimi dayanmalıdır.”

Parlamentin iclasında millət vəkili Elmira Axundovanın təklifi də – Monsteskyönün qəbrinin Fəxri Xiyabandan Yasamal qəbiristanlığına köçürülməsi məsələsi həmkarları tərəfindən yekdilliklə qəbul edildi. Qərarın icrası Bakı Şəhər İcra Hakimiyyətinə tapşırıldı.

Parlamentin sessiyasından sonra AzQosKomediyaya məsələ ilə bağlı eksklüziv şərh verən “Ana Vətən” partiyasının nümayəndəsi Zahid Oruc isə əlavə etdi ki, Fransa ilə işləmək, Avropa dəyərlərindən sapmış bu ölkəni maarifləndirmək lazımdır:

“Tarix Azərbaycan dövlətinin və xalqının üzərinə analoqu olmayan məsuliyyət qoyub. Bu, öz yolundan azan və öz dəyərlərinə xəyanət edən Avropa ölkələrini yenidən sivilizasiyanın qucağına qaytarmaqdan ibarətdir.”

Xatırladaq ki, Fransa parlamentinin aşağı palatasının 22 dekabrda qəbul etdiyi qanun layihəsinə görə “Osmanlı Türkiyəsində ermənilərin soyqırımı olmayıb” kimi ifadələr işlədən hər kəsi 45 min avro cərimə və bir il həbs cəzası gözləyə bilər. “Erməni soyqırımın” inkarını cinayətə çevirən qanun layihəsinin ssverməyə çıxarıldığı iclasda 577 deputatdan təqribən 50 nəfəri iştirak etsə də, layihə böyük səs çoxluğu ilə qəbul edilib.

Layihə qanuna çevrilmək üçün Fransa parlamentinin yuxarı palatası – Senat tərəfindən də qəbul edilməli və Prezident tərəfindən imzalanmalıdır.

Parlament müxbiri Emil Bağırovun eksklüziv xəbərləri əsasında

Akademik Lütfi Zadə işdən çıxarılıb

with 4 comments

90 yaşlı akademik, qeyri-səlis məntiqin yaradıcısı Lütfi Zadə noyabrın 7-də Berklidəki Kaliforniya Universitetində tutduğu professor vəzifəsindən uzaqlaşdırılıb. Bu barədə AzQosKomediyaya eksklüziv olaraq akademikin qohumları məlumat veriblər.

Lütfi Zadə Berklidə kompyuter elmləri, məntiq, riyaziyyat, fizika və elektromühəndislik sahəsi üzrə dərs deyirdi.

Universitet rəhbərliyi akademikin işdən çıxarılmasını onun Kaliforniya ştatının əmək məcəlləsini pozması ilə əlaqələndirsə də, əksini deyənlər də var. Onlar iddia edirlər ki, akademik öz ictimai-siyasi mövqeyinə görə hakimiyyət tərəfindən cəzalandırılıb.

Lütfi Zadə son vaxtlar ABŞ Prezidenti Barak Obamanın və Konqresin iqtisadi siyasətini kəskin tənqid edir, milli birliyin pozulmasında və əxlaq böhranında onları günahkar sayırdı.

Lütfi Zadə son olaraq noyabrın əvvəli Nyu-Yorka səfər etmiş və “Uol-Striti işğal et” (Occupy Wall Street) hərəkatına canlı dəstək olmuşdu.

Amerikanın tanınmış ziyalısı, məşhur siyasi aktivist Noam Çomski hesab edir ki, Lütfi Zadəyə qarşı təzyiqlərin arxasında birbaşa Ağ Ev dayanır:

Təbii, biz hamımız hər şeyi bilirik. Bu təzyiqlər birbaşa Vaşinqtondan gəlir. Amma onlar bilmirlər ki, bu yollarla biz ziyalıları susdura bilməzlər. Daha susmaq olmaz, biz uçuruma gedirik.

ABŞ-ın müxalifətdə olan Respublikaçılar partiyası Lütfi Zadəyə artıq öz dəstəyini bildirib və Berkli Universitetinin bu qərarını qınayıb. Facebook və Twitter isə akademikə dəstək mesajları ilə doludur.

Azərbaycan Dövlət Neft Akademiyası da Lütfi Zadəyə dəstək aksiyasına qoşulub. Akademiyanın rektoru Siyavuş Qarayev Lütfi Zadəni dərs demək üçün Bakıya dəvət edib. Neft Akademiyasında akademik azadlığa həmişə müqəddəs yanaşıldığını deyən rektor, Lütfi Zadə üçün xüsusi kafedranın yaradılacağını da vəd edib.

Written by Ali S. Novruzov

Noyabr 9, 2011 at 8:36 axşam