Şəkil şərtidir

“Yeni Xüravat”dan şok iddia – hökumət ölkəyə cadugərlər ordusu gətirib, yerli və xarici cadugərlərə müxalifət və xalqı tilsimə salmaq tapşırığı verilib.

Azərbaycan hökuməti dünya miqyasında tanınan cadugərlərin xidmətində istifadə etməyə başlayıb, hətta bir çoxunu ölkəyə işləməyə dəvət edib. Bu barədə ölkənin ən mötəbər və nüfuzlu qəzetlərindən biri “Yeni Xürafat” məlumat verib.

Qəzetin yazdığına görə böyük xərclər hesabına həyata keçirilən bu layihənin konkret və ciddi bir məqsədi var: ölkədə kütləvi proseslərin, qarışıqlıqların, inqilabların qarşısını almaq, kütləvi psixoz prosedurları ilə toplumda fəaliyyətsizliyi təmin etmək.

Şərti olaraq “cadugərlər” adlandırılan bu mütəxəssislərin – Afrikanın cənubundan “kuaren deyro”, qərbindən – “nqombo”, mərkəzindən – “menduk”, Yava adalarından – “dikun”, Qrenlandiyadan – “anqanok”, Perudan – “bruco”, Rusiyadan – “çarodey”, “koldun”, Uzaq Şərqdən – “yoq”, “fakir”, Avropadan parapsixoloq və okkult ekspertlərinin Bakıya daşınıb gətirilməsi ötən ilin aprelindən başlayıb.

Qəzet iddia edir ki, ötən il “ərəb bahar”ının Azərbaycandan yan keçməsinin, xalqın ayağa qalxmamasının bir səbəbi də məhz bu “cadugərlər layihəsinin” işə salınmasıdır. Burada əsas hədəf toplum olsa da, əslində müxalifətin önəmli fiqurları da dəvət edilmiş cadugərlər briqadasının cadu və başqa növ enerji yükləmələrinin hədəfindədir. Klassik dillə deyilsə, hazırda dünyanın ən yaxşı və bahalı cadugərləri Azərbaycan müxalifətinin dilini-ağzını bağlamaqla məşğuldur.

Bakıda və ümumiyyətlə əhalinin gur toplaşdığı yerlər, bazarların, universitetlərin və metrostansiyaların giriş-çıxışları xüsusi cadu elementləri ilə tilsimlənib. Metrostansiyaların girişlərində yerə xüsusi mıxlar vurulub, eskalatorlara da bir sıra elementlər bərkidilib – bunlar toplumun dağıdıcı, yıxıcı və ümumiyyətlə, hər cür enerjisini yavaşmalıdır. Belə yerlərdə xüsusi və hiss edilməyən ətirlər yayılır, cadulanmış sular səpilir, hamının əl, yaxud ayaq basa biləcəyi hansısa predmetlər qoyulur.

Mənbəmiz deyir ki, rejimə sadiq olan zəngin məmurlar hakimiyyəti xalqdan qorumaq üçün dünyadakı bir sıra hipnoz, telekinez, zombiləşdirmə və ümumiyyətlə, bugünkü ekstrasensorikanın ən güclü mütəxəssislərini bir komandada toplaya bilib. Bu, hakimiyyətin “əks-inqilab komitəsi” də sayıla bilər.

AzQosKomediya məsələ ilə bağlı hakimiyyət nümayəndələrinə müraciət etsə də onların mövqeyini öyrənə bilməyib. Müxalifət nümayəndələrindən müraciət etdiyimiz Pənah Hüseyn isə bu cəhdlərin əbəs olduğunu bildirib.

“Mən özüm bircə dua yazaram ki, bütün bu tilsimləri sındırar, hələ bir hakimiyyətin özünü tilsimə salar. Nahaq yerə mənə el arasında “Molla Pənah” demirlər. Ondansa getsinlər real siyasi və iqtisadi islahatlara başlasınlar,” deyə Pənah Hüseyn müxbirimizə bildirib.

Eldar Əzizov tortun dadına baxandan sonra

Keyfiyyətsiz ərzaqdan hazırlanmış 50 metrlik tortun ilk qurbanı Sumqayıtın İcra Başçısı Eldar Əzizov olub. O, zəhərlənmə diaqnozu ilə artıq şəhərdəki özəl klinikaların birinə yerləşdirilib.

Prezident İlham Əliyevin 50 yaşının tamam olması münasibətilə Sumqayıt şəhərində Kimyaçılar Mədəniyyət Sarayının qarşısındakı meydanda təqdim edilən 50 metrlik tort keyfiyyətsiz ərzaqdan hazırlanıbmış.

Məsələ ilə Sumqayıt polisi və prokurorluğunun yaratdığı birgə istintaq-əməliyyat qrupu bu xəbəri təsdiqləyib.

Hüquq mühafizə orqanlarının verdiyi ilk açıqlamada deyilir ki, ad günü tortunun hazırlanması zamanı bəzi iş adamları və qənnadıçılar keyfiyyətsiz və vaxtı keçmiş ərzaqlardan istifadə ediblər. Sözügedən tort istehlaka tam yarasız halda olub və Eldar Əzizov da bu səbəbdən zəhərlənib.

Hadisə yerinə Fövqəladə Hallar Nazirliyinin xilasedici qüvvələri də ezam olunub. Hal-hazırda şəhərdə tortdan zəhərlənən digər vətəndaşların axtarışı gedir.

Hadisələri daha yaxından izləmək və vəziyyəti öyrənmək üçün Sumqayıta gələn Azad İstehlakçılar Birliyinin Sədri Eyyub Huseynov Bakının 30 kilometrliyində böyük bir epidemiya ocağının yaranması ehtimalı barədə xəbərdarlıq edib.

Bununla belə sıravi Sumqayıtlılar özlərini gümrah hiss edir və optimistdirlər. Adının çəkilməsini istəməyən bir şəhər sakini AzQosKomediyaya müsahibəsində deyib ki, Eldar Əzizov şəhərə təzə köçdüyündən Sumqayıt havasına öyrəncəli deyil , ona görə də belə xırda problemdən ürəkbulanma keçirib.

Xatırladaq ki, Eldar Əzizovun hələ Gəncədə İcra Başçısı olarkən əsasını qoyduğu bu ənənə – Prezidentin ad gününə nəhəng tortun bişirilməsi bu il ilk dəfədir ki, Sumqayıtda baş tutub. Tortun uzunluğu 50 metr, çəkisi isə 12 ton olub.

Hakimiyyətin bölünməsi prinsipi reallıqda

Fransa Milli Assambleyasının “erməni soyqırımını” inkar edənlərin cəzalandırılması haqqında son qanun layihəsinə Azərbaycan dövlətindən sərt cavab gəldi.

Dekabrın 23-də Milli Məclisin sessiyasında iştirak edən millət vəkilləri fransız mütəfəkkiri Monteskyönün “hakimiyyətlərin bölünməsi“ prinsipindən imtina barədə yekdil qərar qəbul etdilər.

Təşəbbüsün ideya müəllifi YAP-çı deputat Mübariz Qurbanlının çıxışı millət vəkilləri tərəfindən ayaq üstündə, davamlı və sürəkli alqışlarla qarşılandı.

Mübariz Qurbanlı qeyd etdi ki, Azərbaycanın özünün yaratdığı və dünyaya nümayiş etdirdiyi uğurlu dövlətçilik modeli var və 21-ci əsrdə dünyanın bütün mədəni ölkələri Azərbaycan modeli ilə silahlanmalı, prinsipsiz fransızların “prinsipi”ndən çoxdan əl çəkməlidirlər:

“Belə həyati məsələ barəsində gözləmə mövqeyi tutmaq və qardaş türk xalqını tək buraxmaq olmaz. Necə ki, Azərbaycanda hakimiyyətin bütün qolları əl-ələ verib bir ürək, bir mərkəz kimi işləyir, eləcə də Türkiyə və Azərbaycan çiyin-çiyinə verib dağ kimi dayanmalıdır.”

Parlamentin iclasında millət vəkili Elmira Axundovanın təklifi də – Monsteskyönün qəbrinin Fəxri Xiyabandan Yasamal qəbiristanlığına köçürülməsi məsələsi həmkarları tərəfindən yekdilliklə qəbul edildi. Qərarın icrası Bakı Şəhər İcra Hakimiyyətinə tapşırıldı.

Parlamentin sessiyasından sonra AzQosKomediyaya məsələ ilə bağlı eksklüziv şərh verən “Ana Vətən” partiyasının nümayəndəsi Zahid Oruc isə əlavə etdi ki, Fransa ilə işləmək, Avropa dəyərlərindən sapmış bu ölkəni maarifləndirmək lazımdır:

“Tarix Azərbaycan dövlətinin və xalqının üzərinə analoqu olmayan məsuliyyət qoyub. Bu, öz yolundan azan və öz dəyərlərinə xəyanət edən Avropa ölkələrini yenidən sivilizasiyanın qucağına qaytarmaqdan ibarətdir.”

Xatırladaq ki, Fransa parlamentinin aşağı palatasının 22 dekabrda qəbul etdiyi qanun layihəsinə görə “Osmanlı Türkiyəsində ermənilərin soyqırımı olmayıb” kimi ifadələr işlədən hər kəsi 45 min avro cərimə və bir il həbs cəzası gözləyə bilər. “Erməni soyqırımın” inkarını cinayətə çevirən qanun layihəsinin ssverməyə çıxarıldığı iclasda 577 deputatdan təqribən 50 nəfəri iştirak etsə də, layihə böyük səs çoxluğu ilə qəbul edilib.

Layihə qanuna çevrilmək üçün Fransa parlamentinin yuxarı palatası – Senat tərəfindən də qəbul edilməli və Prezident tərəfindən imzalanmalıdır.

Parlament müxbiri Emil Bağırovun eksklüziv xəbərləri əsasında

Lütfi Zadə Berklidə kompyuter elmləri, məntiq, riyaziyyat, fizika və elektromühəndislik sahəsi üzrə dərs deyirdi.

Universitet rəhbərliyi akademikin işdən çıxarılmasını onun Kaliforniya ştatının əmək məcəlləsini pozması ilə əlaqələndirsə də, əksini deyənlər də var. Onlar iddia edirlər ki, akademik öz ictimai-siyasi mövqeyinə görə hakimiyyət tərəfindən cəzalandırılıb.

Lütfi Zadə son vaxtlar ABŞ Prezidenti Barak Obamanın və Konqresin iqtisadi siyasətini kəskin tənqid edir, milli birliyin pozulmasında və əxlaq böhranında onları günahkar sayırdı.

Lütfi Zadə son olaraq noyabrın əvvəli Nyu-Yorka səfər etmiş və “Uol-Striti işğal et” (Occupy Wall Street) hərəkatına canlı dəstək olmuşdu.

Amerikanın tanınmış ziyalısı, məşhur siyasi aktivist Noam Çomski hesab edir ki, Lütfi Zadəyə qarşı təzyiqlərin arxasında birbaşa Ağ Ev dayanır:

Təbii, biz hamımız hər şeyi bilirik. Bu təzyiqlər birbaşa Vaşinqtondan gəlir. Amma onlar bilmirlər ki, bu yollarla biz ziyalıları susdura bilməzlər. Daha susmaq olmaz, biz uçuruma gedirik.

ABŞ-ın müxalifətdə olan Respublikaçılar partiyası Lütfi Zadəyə artıq öz dəstəyini bildirib və Berkli Universitetinin bu qərarını qınayıb. Facebook və Twitter isə akademikə dəstək mesajları ilə doludur.

Azərbaycan Dövlət Neft Akademiyası da Lütfi Zadəyə dəstək aksiyasına qoşulub. Akademiyanın rektoru Siyavuş Qarayev Lütfi Zadəni dərs demək üçün Bakıya dəvət edib. Neft Akademiyasında akademik azadlığa həmişə müqəddəs yanaşıldığını deyən rektor, Lütfi Zadə üçün xüsusi kafedranın yaradılacağını da vəd edib.

Əhməd Zeveyl: “Mən bu dünyada da, o dünyada da elmin zirvəsinə çatdım”

Kimya üzrə Nobel mükafatı laureatı Əhməd Zeveyl Bakı Dövlət Universitetinin fəxri doktoru adına layiq görülüb. Bu münasibətlə oktyabrın 10-da keçirilən mərasimdə Zeveyl hətta göz yaşlarını saxlaya bilməyib.

Tədbiri giriş sözü ilə açan BDU-nun rektoru, akademik Abel Məhərrəmov deyib ki, dünyada 800 nəfərə yaxın Nobel mükafatçısı olsa da, onların arasında BDU-nun fəxri doktoru adı şərəfinə layiq görülən ilk və hələ ki, yeganə şəxs Əhməd Zeveyldir.

Zeveyl 1946-cı ildə Misirdə anadan olub, ali təhsilini İsgəndəriyyə şəhərində aldıqdan sonra ABŞ-a gedib və Pensilvaniya Universitetində doktorluq dərəcəsinə yiyələnib. Hal-hazırda Kaliforniya Texniki İnstitutunda dərs deyir, ABŞ Prezidentinin Elm və Təhsil üzrə Müşavirləri Şurasının üzvüdür. Kimyəvi reaksiyaların keçid mərhələlərinin öyrənilməsində uğurlarına görə 1999-cu ildə Kimya üzrə Nobel mükafatına layiq görülüb.

Əhməd Zeveyl dünyada elmin və demokratiyanın inkişafına verdiyi töhfələrinə, o cümlədən sülhməramlı fəaliyyətinə görə isə BDU-nun Böyük Elmi Şurasının 8 oktyabr 2011-ci il tarixli qərarı ilə BDU-nun fəxri doktoru adına layiq görülüb.

Abel Məhərrəmovun əlindən fəxri doktor mantiyası və diplomunu alan Zeveyl öz nitqində deyib ki, artıq bu dünyada da, o dünyada da elmin zirvəsinə çatıb. Bundan sonra rahatlıqla təqaüdə çıxa və memuarlarını yaza bilər.

AzQosKomediyaya daxil olan eksklüziv məlumata görə, bu xəbər Türkiyəli yazıçı Orhan Pamuku depressiyaya salıb. Bu il də BDU-nun fəxri doktoru adını ala bilməyən yazıçının yaxınlarına dediyinə görə, onu ancaq qardaş Azərbaycandan alacağı belə bir etimad sağalda bilər. O hətta növbəti romanı üzərində işi də yarımçıq buraxmalı olub.

Rüşvət və konvertdən kəsilən məmurların ayağa qalxması gözlənilir

Azərbaycan hökuməti özünün növbədənkənar iclasında ölkədə təcili sürətdə inqilab etmək barədə yekdil qərar qəbul edib. Müvafiq icra orqanlarına inzibati resurslar hesabına olsa belə, Azadlıq meydanını doldurmaq əmr olunub.

Azərbaycanda inqilabi situasiya yaratmaq və çevrilişə nail olmaq üçün Nazirlər Kabinetinə bütün lazımi tədbirlər görmək həvalə olunub, inqilabın koordinasiyası üçün Siyasi İnnovasiyalar Mərkəzinin rəhbəri Mübariz Əhmədoğlunun rəhbərliyi ilə xüsusi qərargah da yaradılıb.

AzQosKomediyaya eksklüziv açıqlamasında Mübariz Əhmədoğlu hökumətin inqilab qərarını onunla izah edib ki, Ermənistanda vəziyyət gərginləşməkdədir və bədnam qonşularımız hər an inqilab edə bilər. Bu məqsədlə də Azərbaycan hökuməti erməniləri qabaqlamaq barədə strateji qərar qəbul edib.

“Biz oturub Azərbaycanda müxalifətin və ya xarici qüvvələrin inqilab etməyini gözləsək, Ermənistanla rəqabəti uduza bilərik. Bu həm qiymətli vaxt itkisidir, həm də reallaşması olduqca dumanlı perspektivdir. Apardığımız araşdırmalar göstərir ki, Yaxın və Orta Şərqi bürüyən inqilab dalğasının Azərbaycana təbii yolla gəlib çatmasına hələ çox var. Bunun üçün də hökumət dərhal məsələyə müdaxilə etməlidir.”

Mübariz Əhmədoğlu inqilabın reseptini açmasa da, bildirib ki, inqilabi proseslər tam şəffaflıq şəraitində və beynəlxalq müşahidəçilərin nəzarəti altında həyata keçiriləcək.

Adının çəkilməsini istəməyən hökumətə yaxın mənbədən aldığımız məlumata görə isə inqilabın resepti olduqca sadədir və son günlər ölkədə korrupsiyaya qarşı aparılan kampaniya bunun əsas komponentidir.

“Rüşvət ala bilməyən və konvertlərdən məhrum olan məmurlar özləri də bilmədən təxribata çəkilir və onlar arasında süni surətdə narazılıq yaradılır. Qəzəbli məmur, müəllim, həkim kütləsinin Azadlıq meydanına toplaşmasına çox az qalıb. Əgər heç kim ayağa qalxmasa belə, inzibati resurslar hesabına meydanı doldurmaq tapşırığı verilib.”

Hadisələrin sonrakı gedişatı haqqında xəbərsiz olduğunu deyən mənbənin sözlərinə görə inqilabi qərargah detallar üzərində işi hələ tam başa çatdırmayıb.

“Bir onu deyə bilərəm ki, bu, Tunisdəki, Misirdəki hadisələrə heç bənzəməyəcək. Bu, analoqu olmayan inqilab olacaq.”

Bu məqsədlə sifariş edilən silikonun ilk partiyası artıq ölkəyə gətirilib.

Rabitə və İnformasiya Nazirliyindən AzQosKomediyaya verilən eksklüziv məlumata görə yaxın bir neçə ay ərzində Azərbaycanda Silikon Vadisinin tikintisinə başlanacaq.

ABŞ-dakı Silikon Vadisi və Rusiyadakı Skolkovo layihələrindən fərqli olaraq Azərbaycandakı Silikon vadisinin tikintisində əsl silikondan istifadə olunacaq. Bu məqsədlə sifariş olunacaq silikonun ilk partiyası artıq ölkəyə gətirilib.

Azərbaycan şou-biznes ulduzları da adı çəkilən layihədə iştirak edəcəklər. Onlar öz silikonlarının bir qismini layihədə istifadə üçün ianə edəcəklər. Bir neçə ay öncə öz dodaqlarından silikonlarını çıxaran Aygün Kazımovanın həmin hərəkətinin arxasında da məhz bu səbəbin dayandığı bildirilir.

Layihədə iştirak edən inşaat şirkətinin adının çəkilməsini istəməyən əməkdaşının sözlərinə görə şou-biznes ulduzlarının ianə etdiyi silikonlar xüsusi muzeydə sərgilənəcək.

Silikon Vadisinin tikiləcəyi ərazi hələ dəqiq bilinməsə də ekspertlər onun ya Şəki-Zaqatala, ya da Quba-Xaçmaz bölgəsində yerləşəcəyini ehtimal edirlər.

Azərbaycanlı oliqarx oğlunun bir işarəsi Moskvanı Ermənistanın qucağına atdı

Avqustun 20-də Yerevanda Ermənistan və Rusiya arasında iki ölkənin prezidentlərinin imzaladığı hərbi müdafiə paktının pərdəarxası məqamları yavaş-yavaş aşkara çıxır.

AzQosKomediyanın adının çəkilməsini istəməyən Kremlə yaxın mənbədən aldığı məlumata görə rəsmi Moskvanı Ermənistanın qucağına atan bu müqavilənin arxasında məşhur “ayı kababının” Rusiyanın hakim dairələrində yaratdığı rezonans dayanır.

Xatırladaq ki, hələ iyulun 2-də Azadlıq qəzetinin yaydığı məlumata görə Azərbaycanlı bir oliqarx oğlu digər bir oliqarxa məxsus ayını kabab etdirərək yemişdi. İlk baxışdan dəliqanlı hərəkəti kimi görünən bu hadisə bir çox politoloqların fikrincə öncədən planlaşdırılmış və Rusiyaya ünvanlanmış incə bir jest idi.

Məsələ ilə bağlı rəyini soruşduğumuz politoloq Azər Məmmədov “ayı kababı” əhvalatının məhz Rusiyaya ötürülən incə mesaj olduğuna heç şübhə etmədiyini bildirib. Onun fikrincə təam kimi ayının və “qonaqlığın” yeri kimi Qəbələnin seçilməsi də təsadüfi deyildir – ayı Rusiyanın qeyri-rəsmi simvoludur və Rusiyanın Azərbaycandakı yeganə hərbi obyekti – radiolokasiya stansiyası Qəbələdə yerləşir.

“Bu, Rusiyanın Dağlıq Qarabağ münaqişəsində tutduğu mövqeyə Azərbaycanın özünəməxsus tərzdə etirazı idi və çox təəssüf ki, Rusiya öz səhvini düzəltmək əvəzinə, Ermənistanın kölgəsinə sığınmağı üstün tutdu,” Azər Məmmədov müxbirimizə bildirib.

Politoloq Vəfa Quluzadənin rəyini öyrənmək üçün onunla əlaqə saxlamağa cəhd etsək də, o, istirahətdə olduğundan müsahibəmiz baş tutmadı. Amma Vəfa müəllimin telefonundakı avto-cavab aparatı aşağıdakıları bildirdi: “Şübhəsizdir ki, Rusiya dağılacaqdır, məhv olacaqdır və son illərin hadisələri onu göstərir ki, proseslər qaçılmaz olaraq bu istiqamətdə gedir.”

Azadlıq Radiosu ABŞ-dan maliyyələşirmiş!

ANS telekanalının apardığı jurnalist araşdırması Azadlıq Radiosu barəsində inanılmaz faktlar aşkarlayıb. Sən demə Azadlıq Radiosu heç də Azərbaycan radiosu deyilmiş. Bu yaxınlarda çəkilməli olan “Qurdlar Vadisi – Azərbaycan” adlı türk serialının ssenarisinə eksklüziv baxış keçirən ANS jurnalistləri Azadlıq Radiosunun ABŞ tərəfindən maliyyələşdirildiyini ortaya çıxarıblar.

Telekanal rəhbərliyindən AzQosKomediyaya verilən açıqlamada bildirilir ki, Azadlıq Radiosunun maliyyəsinin dəqiq mənbəyi də onlara məlumdur – bu, nə qədər inanılmaz görünsə də birbaşa ABŞ Konqresinin özüdür.

Bundan əlavə Azadlıq Radiosu əslində heç müstəqil qurum da deyilmiş. O, mərkəzi ofisləri Vaşinqton və Praqada yerləşən Azad Avropa / Azadlıq radiolarının Azərbaycandakı bürosu imiş!

ANS-in İç Xəbər proqramına bu barədə müsahibə verən Mir Şahin Ağayev isə bildirib ki, onlar əllərində olan faktlarlarla Prezident Administrasiyasına, Heydər Əliyev Fonduna, Mətbuat Şurasına, Azad İstehlakçılar Birliyinin sədri Eyyub Hüseynova və bütün lazımi yerlərə artıq müraciət ediblər.

“Biz Azərbaycana qarşı böyük bir təxribatın və konspirasiyanın üstünü açmışıq. Artıq ikinci dəfədir ki, ANS Azərbaycan dövlətçiliyini məhvdən xilas edir. Biz bir dəfə Türkiyənin ölkəmizdə dövlət çevrilişi planlarına mane olmuşuq, indi isə ABŞ-ın planlarını qarışdırdıq. Əminik ki, müvafiq orqanlar artıq lazımi ölçülər götürürlər,” Mir Şahin İç Xəbərə belə deyib.

Sonda Mir Şahin əlavə edib ki, ANS Azərbaycan dövlətçiliyinin keşiyində bundan sonra da sayıq dayanacaq.

Ziyalılar Oberhauzenli onurğasıza Prezidentdən “Şöhrət” ordeni istədilər.

Futbol üzrə son dünya çempionatı zamanı oyunların qalibini öncədən müəyyən etməklə bəşəriyyəti heyrətə salan Oberhauzenli osminoq Paul Dağlıq Qarabağ münaqişəsinin həlli prosesinə də qoşulub.

Minsk qrupunun həmsədrlərinin çoxsaylı xahişlərindən sonra ağır vasitəçilik missiyasını öz üzərinə götürən səkkizayaqlı ilbiz 20 ildən çoxdur ki, öz həllini tapmayan münaqişəyə dərhal son qoyub. Belə ki, Paul Azərbaycan bayrağı qoyulmuş qabdakı yeməyi Ermənistan bayrağı qoyulmuş qabdakı yeməyə tərcih etməklə Qarabağın da Azərbaycana qaytarılması barədə yekun qərar qəbul edib.

Osminoqun qərarı Bakıda böyük sevinc və yüksək əhval-ruhiyyə içərisində qarşılanıb. Paulun şərəfinə üç gün rəsmi bayram elan olunub və üçüncü günün sonu dünyadada analoqu olmayan atəşfəşanlıq planlaşdırılır.

Azərbaycan Yazıçılar Birliyi, Aşıqlar Birliyi, Jurnalistlər Birliyi, Bəstəkarlaq İttifaqı və Milli Elmlər Akademiyası isə Prezidentə birgə müraciət ünvanlayaraq osminoq Paula “Şöhrət” ordeni verilməsini xahiş ediblər. Müraciətin təşəbbüskarı Professor Yaqub Mahmudlu AzQosKomediyaya eksklüziv açıqlamasında bildirib ki, Paulun damarlarında türk qanının axması şübhəsizdir.

“Tanrı bu ilahi ədaləti yalnız türkə verə bilər,” deyə Professor Mahmudlu əlavə edib.

Ermənistan tərəfi osminoqun seçimi ilə bağlı hələ ki, heç bir rəsmi mövqe bildirməyib. Lakin İrəvandan alınan qeyri-rəsmi məlumatlara görə dövlət idarələrində bayraqlar artıq endirilib, bir qrup Daşnaksütun üzvü isə zooparkda kütləvi sui-qəsd edib.